11 красавіка ў Міжнародны дзень вызвалення вязняў фашысцкіх канцлагераў каля мемарыяльнага комплексу "Ахвярам фашызму" на тэрыторыі Бабруйскай крэпасці прайшоў мітынг, у якім прынялі ўдзел прадстаўнікі выканаўчай улады, прадпрыемстваў і ўстаноў адукацыі, грамадскіх аб'яднанняў.

Гэты дзень стаў адначасова сімвалам найвялікшай трагедыі і смутку, сімвалам стойкасці і бяспрыкладнай мужнасці людзей розных нацый і народнасцяў, воляю лёсу апынуліся ў засценках фашысцкіх лагераў смерці падчас Другой сусветнай вайны. Па дадзеных гісторыкаў на тэрыторыі Германіі і акупаваных краін дзейнічалі больш за 14 тысяч канцлагераў, турмаў і гета. За гады вайны праз іх прайшлі больш за 18 мільёнаў чалавек, з якіх былі знішчаны больш за 11 мільёнаў. Не меншай жорсткасцю адрозніваліся канцэнтрацыйныя лагеры, створаныя фашыстамі на тэрыторыі Беларусі. Найбольш буйныя з іх знаходзіліся ў Мінску — у раёне Нямігі і Трасцянцы, а таксама ў Азарычах, Гомелі, Полацку і Бабруйску. У іх былі знішчаны каля 3 млн мірных жыхароў. За свае злачынствы гітлераўцы адказалі на міжнародным судовым працэсе ў Нюрнбергу, які праходзіў з 20 лістапада 1945 па 1 кастрычніка 1946 года. Адкрытыя суды па найбольш жорсткіх ваенных злачынствах былі праведзены ў гарадах савецкіх рэспублік, у тым ліку ў Мінску, Бабруйску, Віцебску і Гомелі.

Крыніца: Boblife